Tələbələrin əksəriyyəti imtahanda müvəffəqiyyət qazanmaq üçün əllərindən gələni edirlər. Bəzi tələbələr isə rəqabət mühitinə düşərək ən yüksək nəticəni əldə etmək üçün bütün gücləri ilə fasiləsiz çalışırlar. Ancaq ən acınacaqlısı budur ki, bütün bu səylərdən sonra belə bəzi şeylər yolunda getmir və imtahan salonunda istədikləri nəticəni göstərə bilmirlər. Əksər hallarda hər şey tələbələrin zehnində qarışır və öyrəndiklərini xatırlamaqda tərəddüd edirlər. Bəzən isə oxuduqlarını ümumiyyətlə xatırlaya bilmirlər. Çünki çox çalışmaq şərt deyil, əsas şərt ağıllı davranaraq öyrənmə metodlarını inkişaf etdirməkdir. Beləliklə biz sizə öyrəndiklərinizi xatırlamağın 10 fərqli üsulunu təklif edirik. Bu metodları bizimlə öyrənin!
“Ağıllı təhsil”-ə gəldikdə imtahan salonunda öyrəndiklərinizi xatırlamaq üçün müxtəlif metodlardan necə istifadə etməli olduğunuzu bilməlisiniz. Yazaraq öyrənmək, yüksək səslə oxumaq, diaqramlardan və ya qrafiklərdən istifadə etmək, yuxu rejiminə nəzarət, sağlam qidalanmaq, araşdırmalar aparmaq və s. Öyrəndiklərinizi xatırlamaq üçün sadalanan məqamları araşdırmaq başlanğıc addım sayıla bilər.
Fərqləndirici marker və ya işıqlandırıcıdan istifadə edin
Fərqləndirici marker və ya işıqlandırıcıdan istifadə edin: Xüsusilə xatırlamaqda çətinlik çəkdiyiniz məqamlara diqqətinizi çəkmək üçün onları bu cür vasitələrlə işarələyin. Sübut olunmuşdur ki, təhsil prosesində marker və işıqlandırıcıdan istifadə tələbələrin öyrənməkdə çətinlik çəkdikləri məqamları asanlıqla öyrənməsinə və imtahana hazırlaşmağa daha az vaxt sərf etməsinə kömək edir.
Öyrənin və ya paylaşın
Öyrənin və ya paylaşın: Bilik mübadiləsinin vaxtınızı və enerjinizi boş yerə sərf etdiyini düşünməyin, onu açıq qapı kimi qəbul edin və dostlarınıza öyrəndiklərinizi danışmaqdan çəkinməyin. Unutmayın, bilik onu mütəmadi olaraq zənginləşdirmək və bölüşmək üçün zəruridir. Öyrəndiklərinizi aydınlaşdırmaq və başqaları ilə paylaşmaq onu asanlıqla xatırlamağınıza kömək edəcək.
Yazaraq öyrənin
Yazaraq öyrənin: Bildiyimiz kimi insan hərəkətlərini, etdiklərini, danışdıqlarını və s. zehnində depolaya bilir və buna yaddaş deyilir. Yaddaşınızı daim qorumaq üçün düşündüklərinizi yazaraq məşq etdirə bilərsiniz. Unutmayın ki, öyrəndiklərinizi yazmaq xatırlamağı asanlaşdırır. Təsəvvür qabiliyyəti güclü olan tələbə imtahan salonunda öyrəndiklərini xatırlamaq üçün yazı ilə yanaşı özünəməxsus “yaddaş xəritəsi” də tərtib edə bilər.
Yüksək səslə oxuyun
Yüksək səslə oxuyun: Müxtəlif tədqiqatçılara görə yüksək səslə danışan və ya yüksək səslə oxuyan orta məktəb şagirdinin öyrəndiklərini asanlıqla xatırlamaq ehtimalı səssizcə oxuyandan 50 faiz çoxdur. Valideynlərin övladlarına həmişə yüksək səslə oxumalarını söyləməsinin səbəbi də budur, çünki bu oxuduqlarını daha yaxşı xatırlamağa kömək edir.
Diaqram və qrafiklərdən istifadə edin
Diaqram və qrafiklərdən istifadə edin: İmtahana hazırlaşarkən istifadə edə biləcəyiniz ən yaxşı metodlardan biri diaqram və qrafiklərlə araşdırmaqdır. Unutmayın, vizual təsvirin gücü imtahan salonunda oxuduqlarınızı xatırlamaqda ən effektiv vasitə ola bilər. Bunun üçün PowerPoint slaydlarından və digər vizual vəsaitlərdən istifadə etməyiniz tövsiyə edilir.
Düzgün yuxu yaddaşa və stresdən uzaq olmağa kömək edir
Düzgün yuxu: İmtahana görə stresli olmaqda haqlısınız, lakin bu, bütün gecə oyaq qalmalı və dərs etməli olduğunuz anlamına gəlmir. Düzü bir çox tələbə bunun həll olduğunu düşünür, amma açığını deyim, yox, beynin hazırlanması da bir o qədər vacibdir. Məntiqi olaraq beynimizi inkişaf etdirmək üçün yetərli yuxuya ehtiyacımız olduğu sübut edilmişdir. Unutmayın ki, düzgün bir yuxu rejimimiz olmadığı zaman beynimiz həqiqətən istədiyimiz məhsuldarlığı vermir.
Vizual və eyni zamanda səsli öyrənmə
Vizual və eyni zamanda səsli öyrənmə: Vizual olaraq öyrənmək biliyin təkmilləşdirilməsində böyük əhəmiyyətə malikdir. Buna görə sənədli film və ya mövzu ilə əlaqəli videolar izləmək oxuduqlarımızı yaddaşımıza həkk etməyə kömək edir, çünki bu zaman vizual metodla səsli öyrənmə metodu eyni anda hərəkətə keçir. Digər tərəfdən müxtəlif tədqiqatçılara görə klassik musiqiyə qulaq asmaq yaddaşı təkmilləşdirir.
Müntəzəm fasilə verməyi öyrənin
Müntəzəm fasilə verin: imtahanın qapınızı döydüyü ərəfələrdə stresə meyilli olursunuz. Bu stress sizi tələsdirir və təlaşla fasiləsiz oxumağa və öyrənməyə çalışırsınız. Hər halda bilməli olduğunuz bir şey də budur ki, fasiləsiz davamlı oxumağınız sizə heç də müvəffəqiyyətə yaxınlaşdırmır, əksinə, biliyin effektivliyi azalır və layiq olduğunuzdan daha aşağı nəticə əldə etmiş olursunuz. Mütəxəssislərə görə bütün diqqətinizlə çalışma müddəti təxminən 40-90 dəqiqə aralığındadır. Daha sonra 10 dəqiqəlik fasilə verərək istirahət etməyiniz vacibdir.
Sağlam qida
Sağlam qida: Bədənimiz xeyli miqdarda qida maddəsi tələb etdiyi üçün balanslı qida rejiminə riayət etmək xüsusilə vacibdir. Unutmayın ki, sağlamlıq bizə bəxş edilən ən böyük hədiyyədir və xüsusilə imtahan ərəfəsində sağlamlığınızı pozmaq istəməzsiniz. Bu səbəbdən lazımi miqdarda tərəvəz, meyvə, taxıl məhsulları, zülal və s. qidalar qəbul etmək vacibdir.
Oxuduğunuz mövzu haqqında araşdırın
Tədqiqat: oxuduğunuz mövzunun başlığı və ya məzmunu ilə bağlı ətraflı araşdırmalar etməyə çalışın. Bunun effektini məhz imtahan salonunda görəcəksiniz. Yadınızda saxlayın, bilik gücdür və öyrənmək heç vaxt hədər deyil. Sinif otağında öyrəndiyiniz biliklərlə kifayətlənməyin. Daha çox məlumat üçün digər kitablardan, jurnallardan və ən əsası internet üzərindən araşdırmalar aparın. Rəqəmsal dünyada internetdən əldə edə bilməyəcəyimiz bilgi yoxdur.
Əgər siz də ən son bloqlarımızı oxumaq istəyirsinizsə, Oxuyan platformasında blog bölməsini izləməyi unutmayın.
1,107 total views
