Ali təhsil almış yaxınlarımızdan, yaşlı insanlardan, böyüklərimizdən həyatlarında ən maraqlı dövrün hansı olduğunu soruşsaq, sözsüz ki, tələbəlik illərinin adını böyük ehtiramla və nostalji hisslərlə çəkərlər.
Tələbə olmaq sərbəstlik, böyümək və artıq öz taleyini müstəqil şəkildə müəyyənləşdirmək uğrunda çabalamaq deməkdir. Tələbə olmaq çətinlik, dostlaşmaq, öyrənmək deməkdir.
Ancaq tələbə illərini səmərəli və gələcəyinizə “investisiya yatıraraq” keçirmək istəyirsinizsə, ixtisas seçimində diqqətli olmaq və sevdiyiniz və məhz “özünü tapdığınız” ixtisası seçərək ali təhsil almaq vacibdir.
Əks halda tələbələr dərslərə həvəssiz yanaşır, seçdikləri peşədə mükəmməl ola bilmir və nəticədə işsiz qalırlar. “Oxuyan” bu gün sizə 2-ci qrup ixtisasları və həmin ixtisaslarda təhsil almaq üçün hansı universitetə üz tutmalı olduqları haqqında məlumat verəcək. Bununla yanaşı 2-ci qrup testləri və Onlayn 2-ci qrup imtahanları ilə hazırlığa başlaya bilərsiniz.
2-ci qrup ixtisaslarında kimlər təhsil alır?
Biznesyönümlü ixtisaslara həvəsiniz varsa, menecment, marketinq sahələrində özünü inkişaf etdirmək istəyirsinizsə, Azərbaycan iqtisadiyyatında, turizm sahəsində rolunuzun olmağını istəyirsinizsə, 2-ci qrup ixtisasları sizin üçün əvəzedilməzdir.
Bu qrup üzrə hazırlaşaraq gələcəyin müsahibatçısı, marketinq mütəxəssisi, sosioloqu, diplomatı və s. ola bilərsiniz.
İxtisas seçimi edərkən nələrə diqqət edilməlidir?
II ixtisas qrupunu seçmiş abituriyentlər kifayət qədər ixtisas seçimi olduğunu bilməlidir. Amma seçim çoxluğu daha çox araşdırma edib, daha düzgün qərar vermə məsuliyyəti də doğurur. Bacarıqlarınıza, hobbi və maraqlarınıza xüsusi diqqət yetirin. Onlar bu işdə sizin yolunuza işıq tutacaq. Aşağıdakı sualları özünüzə verin:
- Hansı peşə sahiblari mənə maraqlı gəlir?
- Hansı işi görmək mənim üçün yorucu deyil?
- Seçəcəyim ixtisas mənə karyera inkişafı vəd edirmi?
- Seçəcəyim ixtisas üzrə xaricdə təhsil imkanları necədir?
- Bu ixtisas 2-ci qrup ixtisasları arasında mənim üçün ən uyğun olanıdırmı?
- 2-ci qrup ixtisasları üzrə qəbul olan tələbələrin həm universitet, həm də seçdikləri ixtisas barədə rəyləri necədir?
Özünüzü və maraq dairənizi kəşf edin
Daha əvvəl dediyimiz kimi 2-ci qrup üzrə hazırlaşmazdan əvvəl məqsədinizi müəyyənləşdirməlisiniz. Siz, doğrudan, turizm sahəsini sevirsiniz? Bəlkə riyazi biliklər və məntiqi hesablamalar sizin üçün daha cəlbedicidir? Ya da insanın anatomiyası, fauna və flora, canlılar aləmi sizə “başqa sözlər pıçıldayır”?
Qədim xalqların həyatı, İsgəndərin şərqə yürüşü, Qanlı Mediçinin Fransada əsdirdiyi soyuq küləklər də az maraqlı deyil. Sizin öhdənizə düşən ilk olaraq nəyi sevdiyinizi dəqiqləşdirməkdir.
Əgər həvəs dairənizi müəyyənləşdirsəniz, məqsədiniz uğrunda çalışmaq daha əyləncəli olacaq və uğur da zəhmətin ardınca qaça-qaça gələcək.
2-ci qrup ixtisas seçimləri arasında seçim etmək üçün kiçik məsləhətlər
2-ci qrup ixtisasları arasında seçim etməzdən əvvəl həmin ixtisaslar haqqında kiçik araşdırma edin. Çünki peşələrin əksəriyyəti maraqlı olmağı ilə bərabər yorucu fəaliyyət və ya zehni əmək tələb edir.
Digər tərəfdən bu sahənin maraqlı və əyləncəli tərəflərini kəşf etməyə çalışın. Seçəcəyiniz ixtisasın karyeranızda yüksəliş vəd edib-etmədiyini öyrənin. İşləyəcəyiniz regionda həmin ixtisasa tələbat varmı?
Xaricdə ixtisasınız üzrə ustalaşmaq üçün hansı imkanlar var? Əlbəttə, Şumer dili və ədəbiyyatını öyrənən bir tələbənin öz karyerasını inkişaf etdirmək imkanı regionşünaslıq üzrə təhsil alan tələbədən heç də çox deyil.
Və ən vacibi maraqlandığınız ixtisas üzrə təhsil almış və ya hal-hazırda təhsilini davam etdirən tələbələrin rəyini öyrənin. Bu ixtisas üzrə hansı universitetdə daha yaxşı təhsil alacağınızı dəqiqləşdirin. Unutmayın ki, sonrakı peşmançılıq heç kəsə fayda vermir.
2-ci qrupda təhsil ala biləcəyiniz ixtisas və universitetlər
İxtisas seçimi, təbii ki, universitet seçimindən öndə dayanır. Prioritet ixtisası düzgün seçmək olsa da, universitetin seçimində edilən yanlışlıq alacağınız təhsilin keyfiyyətinə birbaşa təhsil edə bilər.
Bu başlığın altında 2-ci qrup ixtisasları arasında ən yayğın olanları və əgər bu ixtisası seçmək istəyirsinizsə, hansı universitetdə yaxşı təhsil ala biləcəyinizi qeyd edəcəyik.
Beynəlxalq münasibətlər
Siyasət elminin bir bölməsi olub adından da göründüyü kimi beynəlxalq təşkilatlar və dövlətlərin hüquq çərçivəsində bir-biri ilə əməkdaşlığının təşkil edilməsi barədə biliklərin aşılanmasına xidmət edir.
Bu ixtisas üzrə təhsil alan tələbələr gələcəyin Azərbaycanı siyasi arenada təmsil etmək üçün xidmətə cəlb olunacaq potensial diplomatlarıdır. Əgər dövlətlərarası münasibətlər və geosiyasi proseslər sizi maraqlandırırsa, bəlkə də, bu ixtisas elə məhz sizin üçündür.
Daxilinizdə yatan siyasətçini üzə çıxarmaq üçün bu sizə bir şans ola bilər.
Azərbaycan Diplomatik Akademiyası (ADA)
Azərbaycan universitetləri arasında nüfuzlu yerlərdən birinə sahib olan ADA universiteti dövlətimiz üçün savadlı kadrlar yetişdirmək yolunda inamla irəliləyir.
Maliyyə dəstəyiniz varsa, beynəlxalq münasibətlər ixtisası üzrə ən uyğun universitet məhz ADA universitetidir. Bununla yanaşı siz burada biznesin idarəedilməsi və iqtisadiyyat ixtisasları üzrə də keyfiyyətli təhsil ala bilərsiniz.
Biznesin idarə edilməsi
Bu ixtisas üzrə təhsil alan tələbələr potensial iş adamları kimi dünya bazarına yönələ bilərlər. Biznes fəaliyyətinin səmərəli şəkildə təşkili barədə biliklərin tələbələrə öyrədilməsi bu ixtisasın prioritet məsələsidir.
Əgər siz də bizneslə məşğul olmağa və biznes fəaliyyətinin gətirmiş olduğu riskləri gözə almağa hazırsınızsa, niyə də bu ixtisası seçməyəsiniz?
Bakı Ali Neft Məktəbi (BANM)
Daha çox mühəndislərin ali məktəbi olaraq ad qazansa da, BANM bu ildən etibarən biznesin idarə edilməsi ixtisası üzrə tələbə qəbulu həyata keçirir. Tədrisin davam etdirildiyi digər ixtisaslarda olduğu kimi bu ixtisas üzrə də ölkə birincilərini təhsilin keyfiyyəti ilə özünə çəkməyi bacarıb.
Digər ixtisaslar üzrə universitetin əldə etdiyi uğurları göz özünə gətirdikdə bu ixtisas üzrə də kifayət qədər uğurlu olacağını düşünmək olar.
İqtisadiyyat
II qrup ixtisasları arasında həmişə populyar olan bir ixtisas var ki, o da iqtisadiyyatdır. Öz torpaqlarını işğaldan azan edən qalib dövlətin hal-hazırda prioritet məsələsi iqtisadiyyatını gücləndirməkdir və iqtisadiyyatı güclü olan dövlət daim qalib dövlətdir.
Azərbaycan dünyadakı ən məşhur neft ölkələrindən biridir və dövlət iqtisadiyyatın neft sektorundan asılılığını azaltmaq üçün qeyri-neft sektoruna investisiyalar yatırır. Bu investisiyaların düzgün idarə olunması üçün savadlı iqtisadçıların yetişməsi vacibdir.
Özünüzdə bu potensialı görürsünüzsə, iqtisadiyyat ixtisası sizin üçün açar rolunu oynaya bilər.
Azərbaycan Dövlət İqtisad Universiteti (ADİU)
Azərbaycan Dövlət İqtisad Universiteti illər keçməsinə baxmayaraq savadlı iqtisadçıların yetişdirilməsində universitetlər arasında öz liderliyini qorumaqda davam edir. Hər il ölkəmizə minlərlə kadr bəxş edən ADİU gələcəyin iqtisadçıları üçün əvəzolunmaz məktəbdir. Bu universitetdə nəinki iqtisadiyyat üzrə, həmçinin mühasibat uçatı və audit, sənayenin təşkili və idarəolunması, menecment, marketinq, biznesin idarəedilməsi və s. ixtisasları üzrə də təhsil ala bilərsiniz.
Əgər siz də düzgün ixtisas seçimi etmək və ən vacibi, imtahanlarda müvəffəqiyyət qazanmaq istəyirsinizsə, “Oxuyan” bu yolda sizin ən sevimli köməkçiniz olacaqdır.
Əgər siz də ən son bloqlarımızı oxumaq istəyirsinizsə, Oxuyan platformasında blog bölməsini izləməyi unutmayın. İmtahanlara hazırlaşmaq üçün isə online imtahanlar bölməmizi ziyarət edə bilərsiz.
6,762 total views
