Növbəti bloqumuzda biz – oxuyan.az komandası olaraq sizlərə 9-cu sinif buraxılış imtahanı, imtahanın strukturu və imtahanda uğurlu nəticə əldə etməyin sirrləri barəsində tövsiyələrimizi bölüşəcəyik. Məlumat üçün bildirmək istəyirik ki, buraxılış imtahanları DİM-in təşkilatçılığı ilə 11 illik tədris müddəti boyunca yalnız 9 və 11-ci siniflərdə həyata keçirilir. 9-cu sinif buraxılış imtahanında iştirak etmək istəyən şagirdlər üçün DİM-in saytından qeydiyyatdan keçmək tələbi qoyulmur.Şagirdlər sadəcə imtahana təqribi 1 həftə müddət qalmış buraxılış vərəqəsini DİM-in saytına daxil olaraq çap etməlidirlər. Buraxılış vərəqəsini əldə etmiş şagird aşağıdakı məlumatları əldə etmiş olur.
- imtahanın keçiriləcəyi şəhər (rayon),
- bina, zal
- imtahanın başlanma vaxtı və şagirdin imtahan binasına gəlmə vaxtı,
- imtahanın keçirələcəyi binaya nələr gətirmək qadağandır və s.
Buraxılış imtahanlarının formatı (9-cu sinif)
Nazirlər Kabinetinin 18 may 2020-ci il tarixli qərarı ilə 9-cu sinif Buraxılış imtahanları bir mərhələdə həyata keçirilir. İmtahanlar 3 müxtəlif fənndən (tədris dili, riyaziyyat və xarici dili) ibarətdir və hər biri 30 sualdan ibarətdir. Maksimal bal hər fənn üzrə 100 bal şkalasında dəyərləndirilmişdir. 2021-ci ildən etibarən imtahan modeli yenilənmiş və imtahanda şagirdlərə tədris dilindən 30, riyaziyyat fənnindən 25, xarici dil fənnindən isə 30 tapşırıq olmaqla, ümumilikdə 85 test tapşırığı təqdim olunur
Qeyd. Bəzi hallarda, tədris dilinin Azərbaycan dilindən fərqli olduğu hallar müşahidə edilir. Bu hallarda həmin şagirdlər Azərbaycan dilindən əlavə imtahanda iştirak etməlidirlər. İmtahan müddəti 45 dəqiqə olmaqla, 30 qapalı test tapşırığından ibarətdir.
Buraxılış imtahanı suallarının formaları
Yuxarıda qeyd etdiyimiz kimi, 9-cu sinif şagirdləri tədris dili fənni, riyaziyyat fənni və xarici dili fənni olmaqla, ümumilikdə 85 sualdan ibarət bir imtahanda iştirak edirlər. Şagirdlərin həmin imtahana kimi mütəmadi şəkildə hazırlaşmağı və çoxlu sayda oxşar sınaq testləri etməyi onların yekunda uğurlu nəticə əldə etmələrinə birbaşa təsir edəcəkdir. Oxuyan.az təhsil platformasında şagirdlər onlar üçün maraqlı və ya anlaşılması nisbətən çətin olan istənilən mövzu barəsində çoxlu sayda sınaq testləri işləyə bilərlər.
Indi isə növbə imtahan suallarının formaları ilə tanış olmaqdadır
Tədris dili (100 bal):
- Qrammatik dil qaydalarına uyğun olaraq, qapalı tipli 10 sual;
- Oxuyub-anlamaya dair 2 mətn (hər mətndə 10 tapşırıq qeyd edilmişdir: bunlardan 8 sual qapalı tipli, digər 2 sual isə yazılı şəkildə cavablandırılması tələb olunan suallardandır):
Riyaziyyat fənni (100 bal)
- Qapalı tipli 15 sual;
- Açıq tipli 6 tapşırıq;
- Həllinin hər addımının ətraflı şəkildə qeyd edilməsi lazım olan açıq tipli 4 sual:
Xarici dil fənni (100 bal)
- Dinləmə ilə bağlı 1 mətn ( ümumilikdə, 6 sual)
- Qapalı tipli 16 sual
- Oxuyub başa düşmə ilə əlaqədar 8 sual ( Qeyd: bu suallardan 3-ü açıq, qalan 5 sual isə qapalı tiplidir)
9-cu sinif buraxılış imtahanı – kolleclərə qəbul
9-cu sinif Buraxılış imtahanlarının ən önəmli özəlliklərindən biri məhz toplanılmış yüksək ballar sayəsində kolleclərdə yaxud peşə məktəblərində təhsili davam etdirməyin mümkünlüyüdür. Bu kolleclərdən bəziləri ödənişli, digərləri isə dövlət sifarişlidir. Şagirdlər kolleclərə kodlaşdırma edərkən həm ödənişli olub-olmamasına, həm də ki, qəbul zamanı qabiliyyət imtahanının tələb edilib-edilməməsinə diqqət etməlidirlər.
Bu hissədə biz- oxuyan.az komandası sizlərə bəzi kollec adlarını, ixtisasları və keçid ballarını təqdim edəcəyik, Amma vacibdir ki, 9-cu sinif buraxılış imtahanı verən şagirdlər kolleclərə kodlaşdırma edərkən ən son nəşr Abituriyent jurnalına istinad etsinlər,
Bakı Qida Sənayesi Kolleci
- Peşə təlimi (125.4)
- Marketinq (144.1)
- Ət və Süd məhsullarının texnologiyası (112.3)
Bakı Dövlət Sosial-İqtisad Kolleci
- Arxiv işi və kargüzarlıq (136.3)
- Mühasibat uçotu (161.5)
- Bank işi (157.4)
Bakı İdaretmə və texnologiya Kolleci
- Kompüter şəbəkələrinin və hesablanma texnikasının təmiri və servis xidməti (149.7)
- İnformasiya texnologiyaları sistemləri (136.0)
- Dizayn* (109.3)
Qeyd: Abituriyent jurnallarında * qoyulan hissə müvafiq ixtisasın qabiliyyət imtahanı tələb etməsini bildirir.
9-cu sinif buraxılış imtahanlarında uğur qazanmağın sirləri
İlk öncə buraxılış imtahanına daxil edilən bütün mövzularla yaxından tanış olun. Daha sonra mövzular arasından hər hansı çətinliyiniz olan mövzuları ayırın. İmtahana hazırlaşarkən həmin mövzulara digərləri ilə müqayisədə daha çox diqqət yetirin.Nəzəri biliklərinizi zənginləşdirməklə yanaşı çoxlu sayda mövzu sınaq testləri işlədiyinizdən əmin olun. Mövzulara aid sınaq testlərini Oxuyan.az platformasına daxil olaraq asanlıqla işləyə bilərsiniz. Bu platformanın ən əsas üstünlüklərindən biri test tapşırıqlarının və mövzu sınaqlarının çoxluğu və hər kəs üçün əlçatan olmasıdır. Test tapşırıqlarını həll edərkən sadə səhvlərə yol verməməyə çalışın, çünki bir çox hallarda şagirdlər çox lüzumsuz səhvlər edirlər: məsələn, sualları səhv oxuyurlar, sualda tələb ediləndən daha çox və ya az cavab yazırlar, testi cavablandırarkən düzgün həll etmələrinəbaxmayaraq cavablarını qeyd edərkən səhvə yol verirlər və s. Bu kimi halları aradan qaldırmaq üçün bacardığınız qədər çox sınaq testləri həll edin və ən əsası, bütün bunları edərkən zamana nəzarət etməyi unutmayın.
Həllini bildiyiniz suallardan başlayın.
Sualları həll etməyə başlarkən cavabını bilmədiyiniz və ya həllindən əmin olmadığınız sualların üzərində çox dayanmayın. Əvəzində həll yolunu bildiyiniz sualları sürətli və diqqətli şəkildə cavablandırmağa çalışın. Bu sizlərə buraxılış imtahanları, qəbul imtahanı və ya istənilən mövzu sınaq testlərində zamanı düzgün şəkildə idarə etməyinizə kömək edəcək.
Cavablandırmaq istədiyiniz suallar arasında hansı sualı və ya sualları həll etməyin daha çox vaxt aparacağını düşünün. Əgər hər hansı bir sual digərlərindən daha çox bal verirsə, o zaman həmin suala daha çox vaxt ayırmağınız məqsədəuyğundur. Araşdırmalar göstərir ki, imtahanda ilk öncə asan suallardan başlayıb və daha sonra çətin sualları həll etməyə çalışan şagirdlər daha uğurlu nəticə əldə edirlər.
Son olaraq, imtahanlarda uğur qazanmağın ən önəmli faktoru düzgün planlama və suallara fokuslanmaqdır. İmtahanlar barəsində tövsiyələr və texnikalar üçün Oxuyan.az platformasının “İmtahan üçün tövsiyə və texnikalar” bloquna istinad edə bilərsiniz.
Əgər siz də ən son bloqlarımızı oxumaq istəyirsinizsə, Oxuyan platformasında blog bölməsini izləməyi unutmayın. İmtahanlara hazırlaşmaq üçün isə online imtahanlar bölməmizi ziyarət edə bilərsiz.
18,206 total views
