İmtahan günü gəlir. Ümid edirik ki, imtahanlarınıza yaxşı hazırlaşmısınız. Bəs elə imtahan zalında nəticələrinizi yaxşılaşdırmaq üçün istifadə edə biləcəyiniz metodlar və imtahan üçün tövsiyə strategiyaları varmı? Yaxşı xəbər – var.
Düşüncənizi idarə edin
İmtahanlara görə narahat olmağınız təbiidir, amma müxtəlif strategiyalarla onları öz lehinizə çevirməyiniz mümkündür. Özünüzü narahat hiss edirsinizsə, o zaman bu enerjinizi müsbət istiqamətə çevirin. Unutmayın ki, stress bəzən faydalı ola bilər. Bu sizin ayıq olmağınıza, fikrinizi imtahan üzərində cəmləməyinizə və enerjili qalmağınıza kömək edə bilər.
İmtahan təlimatları və suallar ilə tanış olun
Təlimatlarla tanış olmadan suallara başlamağa tələsməyin. Təlimatları və bütün sualları yavaş-yavaş və ən azı iki dəfə oxuyun. Hər bölmədən neçə suala cavab verməli olduğunuza əmin olun.
Hər dəqiqəni hesablayın
Cavab verəcəyiniz sualları dəqiqləşdirdikdən sonra vaxtınızı planlaşdırın. Hər bölməyə və ya suala başladıqdan sonra tez bir zamanda sualları həll etməyə çalışın. İmtahan vaxtının bitməsindən ən azı on dəqiqə əvvəl imtahanı yekunlaşdırmağı planlaşdırın.
Zamanlamanıza planlaşdırdığınız kimi əməl edin. Cavabını bildiyiniz, ancaq əmin olmadığınız sualların üzərində çox dayanmaq əvəzinə bildiyiniz sualları sürətli və diqqətli şəkildə cavablandırmağınız daha yaxşı olar.
Cavablandırmaq istədiyiniz suallar arasında hansı sualı və ya sualları həll etməyin daha çox vaxt aparacağını düşünün. Əgər hər hansı bir sual digərlərindən daha çox bal verirsə, o zaman həmin suala daha çox vaxt ayırmağınız məqsədəuyğundur. Respondentlərin çoxu ən asan suallarla başlayıb daha çətin sualları sonraya saxlamağı faydalı hesab edir.
Müəllimləriniz kimi düşünün
Bildiyimiz kimi bəzi imtahanlarda (məsələn: abituriyent testləri və s.) açıq tipli suallar olur və bu suallara verdiyiniz cavablar müəllimlər tərəfindən yoxlanılır. Sualları aydın və başa düşülən şəkildə cavablandırın. Çünki müəllimlərin sizin cavablarınızda nəyi nəzərdə tuta biləcəyinizi düşünməyə vaxtları yoxdur. Siz aydın və başa düşülməsi asan şəkildə yazdığınız təqdirdə fikrinizi qarşı tərəfə rahatlıqla çatdıra bilərsiniz və bu sizə layiq olduğunuz qiyməti almağınıza kömək edə bilər.
Suala dolğun cavab verin
Sualda nəyin tələb olunduğunu diqqətlə yoxlayın. Cavablandırmaq üçün doğru məlumatı seçin və lazımsız məlumatları daxil etməyin. Nəzərinizə çatdırım ki, ümumi mövzuda bildiyiniz hər şeyi yazmağınız doğru deyil, çünki bu, sualı həqiqətən başa düşmədiyinizi göstərir. Bundan başqa vaxtınızı boş yerə israf etmiş olursunuz.
Struktur və seçim
Daha uzun cavablar tələb olunursa, materialı hissələrə bölərək aydın şəkildə yazmağa çalışın. Bu, müəllimlərin verdiyiniz cavabları asanlıqla təhlil etmələrinə və düşüncələrinizi izləmələrinə kömək edəcək.
“Bunu etdiyimə inana bilmirəm!” – Aşkar səhvlərdən çəkinin
Hər il tələbələr ən sadə səhvlərə görə lüzumsuz yerə qiymət itirirlər: sualları səhv oxuyurlar, sualın tələb etdiyindən çox az və ya həddindən artıq çox cavab yazırlar, testi cavablandırarkən düzgün həll etmələrinə rəğmən cavablarını qeyd edərkən səhvə yol verirlər və s. Bu cür lüzumsuz səhvlərin ortadan qaldırılması imtahan üçün vacibdir, çünki bu hadisələr tələbələrin və ya abituriyentlərin layiq olduqlarından daha aşağı nəticə göstərmələrinə gətirib çıxarır.
Yekun yoxlama
Sonda bütün cavablarınızı yoxlayaraq səhvlərinizi aşkar edə və düzəlişlərinizi edə bilərsiniz. Əskik yazdığınız sözləri yoxlayın və cavablarınızın mənalı olub-olmadığını görmək üçün yavaş-yavaş oxuyun. Son yoxlamalar çox vacibdir, buna görə də imtahan zamanı vaxtınızı düzgün şəkildə planlaşdıraraq yekun yoxlamalara vaxt qalacağından əmin olun.
Düşünmək üçün yemək
Susuz qalmayın – su için. Qoz, fındıq kimi qidalar qəbul edin, çünki bu sizi imtahan boyunca enerjili saxlayacaq. Şirniyyat və ya şokolad kimi qidalar qəbul etmək məsləhət görülmür, çünki bu sizə imtahanın irəliləyən dəqiqələrində yorğunluq hissi verə bilər.
Ən yüksək göstəriciyə nail olmaq üçün bu imtahan üçün tövsiyə və strategiyalarına əməl etməyiniz çox vacibdir. Əlavə olaraq verəcəyiniz imtahandan bir neçə həftə, hətta bir neçə ay öncə nə qədər çox hazırlaşsanız, əldə edəcəyiniz nəticə bir o qədər yüksək olacaq.
Oxuyan komandası sizə qarşıdan gələn imtahanlarınızda müvəffəqiyyətlər arzu edir!
Əgər siz də ən son bloqlarımızı oxumaq istəyirsinizsə, Oxuyan platformasında blog bölməsini izləməyi unutmayın.
1,372 total views
