Hamımız səhv edə bilərik. Test, imtahan və sınaqlarda səhv etmək üçün ideal məqamlar olmasa da, yəqin ki, tez-tez testlər edir və imtahanlarda iştirak edirik.
Bu bloqda sizə ən çox qarşılaşdığımız səhvlərdən bəhs edəcəyik. Belə ki, imtahana hazırlaşarkən öyrənmədiyiniz mövzular və ya mövzuyla bağlı kifayət qədər məlumatınızın olmaması səhv etmə ehtimalınızı artırır. Əksər insanların rastlaşdığı və qaçınılmaz olan səhvlərin başlıca səbəblərindən biri də elə budur. Lakin bir qrup insan digərlərindən daha az səhv edir və çox asanlıqla səhv edən birisinizsə, çox güman ki, digər insanların da bu səhvləri necə etməsi ilə çox maraqlanacaqsınız.
Gəlin imtahan müddətində etdiyiniz lüzumsuz səhvlərdən çəkinməyin ən yaxşı yollarını nəzərdən keçirək və siz də bu müddətdə bəzi vacib qeydlər edin.
Niyə imtahanlarda səhv etməyə davam edirəm?
İnsanların səhv etmələrinin əsas səbəbi nədir? Onların ən vaciblərindən bəziləri barədə danışdıq, amma bir az daha sistemli şəkildə nəzərdən keçirək.
Tələbələrin test edərkən səhv etmələrinin əsas səbəblərini 3 kateqoriyada ümumiləşdirmişik. Bunlar lüzumsuz edilən səhvlərinizi aradan qaldırmaq üçün həll etməli olduğunuz vacib problemlərdir.
Buradakı ilk səbəb olduqca açıq olsa da, digər ikisi insanların laqeyd yanaşdıqları və hazırlıq işlərində nəzərə almadıqları cəhətlərdir.
İmtahan mövzusu haqqında məlumatsızlıq
Birinci səbəbdən bir qədər öncə bəhs etdik. Belə ki, mövzunuz barədə tam və kifayət qədər məlumatınız yoxdursa, imtahan müddətində lüzumsuz səhvlər qaçınılmaz olacaq.
Bu, bütün fənlərə aiddir. Riyaziyyat imtahanındasınızsa, mövzuya kifayət qədər bələd deyilsinizsə, bir düsturu başqası ilə qarışdıracaq və ya bir tənliyi yanlış xatırlayacaqsınız. Tarixdəki xronologiyaları və ya ədəbiyyatdakı sitatları araşdırmağa kifayət qədər vaxt sərf etməmisinizsə, bu tip sualları cavablandırarkən də lüzumsuz səhvlərə yol verəcəksiniz.
Zəif imtahan texnikası
Tələbələrin tez-tez səhv etməsinə səbəb olan bir başqa amil isə imtahan texnikalarıdır. Buna müxtəlif tip sualları necə cavablandırmaları, imtahan vaxtını nə dərəcədə düzgün idarə etmələri və müəllimlərinizin həqiqətən axtardıqları cavabları nə şəkildə vermələri aiddir.
Bu, həqiqətən, imtahanlarda yüksək bal toplamağın ən vacib yollarından biridir. Əgər laqeyd yanaşsanız, bu sizin daha zəif nəticə göstərməyinizə gətirib çıxara bilər. Müəllimləriniz bu barədə danışarkən onları diqqətlə dinləyin.
Stres
Son olaraq imtahanlarda səhvə yol verməyin başqa bir əhəmiyyətli səbəbi də vardır ki, bu da stresdir. Stres sualı nəinki düzgün oxumağınıza və cavab verməyinizə, zamanı düzgün idarəetmə bacarıqlarınıza və məntiqi düşünmə tərzinizə də təsir edə bilər. Ümumilikdə, imtahana istər yüksək, istərsə də orta səviyyədə streslə daxil olanların imtahan ərzində səhv etmək ehtimalları stresi idarə edə bilən şəxslərdən qat-qat yüksəkdir.
Sözün əsl mənasında idarə edilməyən stres fikrinizi cəmləmənizə mane olur. Buna görə də imtahana hazırlaşarkən stresi idarə etməyi də öyrənməlisiniz.
Bəs imtahan və sınaqlarda edilən səhvləri azaltmaq üçün hansı üsullar var?
Öyrənmək və yenidən nəzərdən keçirmək üçün bütün mənbələrdən istifadə edin.
Dediyimiz kimi, özünüzü dərslikləriniz və ya test kitabçanızla məhdudlaşdırmayın və eyni materialı təkrar-təkrar araşdırmayın. Mümkün olan bütün materiallardan istifadə edin və əlavə məlumatlar əldə etməkdən çəkinməyin. Daha doğrusu, dərsliklərdən tutmuş qəzet məqalələrinə (uyğun olduqda), onlayn təhsil materiallarından götürdüyünüz qeydlərə qədər müxtəlif mənbələrlə tanış olun. Bunlar yüksək nəticə əldə etməyiniz üçün vacibdir.
Materialınızı yüksək səviyyədə öyrənin.
İmtahanlarda uğur qazanmağın təməli materialları mükəmməl şəkildə öyrənməkdir. Şübhəsiz ki, bilməli olduğunuz şeyi bilmirsinizsə, səhv etməyiniz gözləniləndir.
Məsləhətdir ki, imtahandan əvvəlki gecə gərgin bir şəkildə dərs etmək əvəzinə bütün bu materialları zamanla beyninizə yeridəsiniz. Bu şəkildə ortaya daha keyfiyyətli iş çıxarmış olacaq və imtahan günü bildiklərinizi daha yaxşı xatırlayacaqsınız.
Başqalarının səhvlərindən nəticə çıxarın.
İmtahan səhvlərindən qaçmağın bir yolu isə hansı ümumi səhvlərdən ehtiyat edəcəyinizi bilmək və buna görə də başqalarının hansı səhvlərə yol verdiyini öyrənməkdir.
İmtahan və sınaqdan əvvəl istirahət etməyi unutmayın.
Yuxarıda stresdən bəhs etdik. Stres səviyyənizi azaltmanın ən yaxşı yollarından biri kifayət qədər yaxşı istirahət etdiyinizdən əmin olmaqdır. Əgər yorğunsunuzsa və sadəcə qəhvə ilə kifayətlənirsinizsə, imtahan zamanı əldə edə biləcəyiniz müvəffəqiyyət sizdən çox uzaqda olacaq. Buna görə də günlük plan qurmalı və istirahətinizə kifayət qədər zaman ayırmalısınız.
Əgər siz də ən son bloqlarımızı oxumaq istəyirsinizsə, Oxuyan platformasında blog bölməsini izləməyi unutmayın.
1,179 total views
