Oxumaq vərdişi yaratmaq üçün sadə və isbat olunmuş bəzi üsullar var. Həmin üsullardan istifadə etsəniz işiniz dəfələrlə asan olacaq.
Vərdişləriniz xəyalınızla üst-üstə düşmürsə, ya vərdişlərinizi dəyişdirməlisiniz, ya da xəyallarınızı
John C. Maxwell
Bizim tövsiyəmiz odur ki, məcbur qalmadıqca xəyallarınızı dəyişdirməyin. Onlar üçün çalışmaq sizi yalnız irəli aparar.
Gündəlik həyatda nəyi şikayətsiz və davamlı etdiyinizə nəzər salsanız, vərdiş cavabı ilə qarşılaşarsınız. Əgər hər hansı fəaliyyət sizin vərdişinizə çevrilibsə, onu yerinə yetirərkən çox enerji sərf etmirsiniz. Bu sizin üçün olduqca asan bir hal kimi gəlir. Oxumaq vərdişi əldə etdikdən sonra artıq dərsləri, kitabları, materialları öyrənmək üçün əziyyət çəkməyəcəksiniz. Bu sizin günlük rutininizin bir hissəsinə çevriləcək.
Köhnə vərdişlərə yeni vərdişlər bağlayın
Yəqin ki, hər gün etdiyiniz və zövq aldığınız müəyyən vərdişlər var. Qazanmaq istədiyiniz vərdişi hazırki vərdişinizlə əlaqələndirin.
Məsələn: Düşünək ki, siz səhər daha yaxşı dərs oxuya bilirsiniz və hər səhər kofe içmək vərdişiniz var. Kofe içmək vərdişinə artıq sahibsiniz, dərs oxuma vərdişini isə yaratmalısınız. Hər səhər kofe içərkən dərs materiallarınızı da əlinizə alın və oxumağa başlayın. Qısa zamanda yeni vərdişi yerinə yetirdiyinizi görəcəksiniz.
Yaxud belə təsəvvür edək. Siz gecələr daha yaxşı oxuya bilirsiniz. Bu zaman hər gün axşam yeməyindən sonra 1 saat oxumaqla məşğul olun. Bir vərdişin üzərinə digərini gətirin.
Davamlı təcrübə ilə yeni vərdişinizi bir neçə həftə ərzində əlavə səy göstərmədən etməyinizi sizə zövq verəcək.
Kiçik addımlarla başlayın
Yeni hansısa fəaliyyətə başlamaq istəyənlərin ən çox etdiyi səhvlərdən biri məhz budur. Bəlkə siz də bunu nə vaxtsa etmisiniz. Özünüzə söz verisiniz ki, sabahdan kitab oxuyan biri olacaqsınız və hədəfi 50 səhifə qoyursunuz. Təbii ki, cəmi bir neçə cəhddən sonra siz artıq kitabın üzünü belə görmək istəmirsiniz.
50 səhifənin əvəzinə 5 səhifə ilə başlayın və hər gün sayı artırın. İdmana başladığınızı düşünün. İlk dəfədən 50 kq çəki qaldıra bilməzsiniz. Azdan çoxa doğru hərəkət etməlisiniz. Bu oxumaq vərdişinə də aiddir. Kimya fənnindən reaksiyaları əzbərləmək lazımdırsa, birinci gün ikisini, növbəti gün üçünü öyrənərək başlayın. Oxumağı özünüzə sevdirmiş olacaqsınız.
Oxumaq vərdişi üçün davamlılığı saxlayın
Bəhanələrin sizi aldatmasına icazə verməyin. Çox yorğun ola bilərsiniz, ümumiyyətlə oxumaq istəməyə bilərsiniz. Amma 1 gün belə vərdişi axsatanız, artıq ona bağlılığınız zəifləyəcək. Ona görə azla başlayın və davamlılığı saxlayın.
Məsələn, yorğunsunuzsa, oxumaq istəmədiyinizi və halınızın olmadığını düşünməyin. Kitabı əlinizə alın və günlük hədəfinizi tamamlamağa çalışın. Yorğun olduğunuzu nə qədər çox düşünsəniz, o sizə bir o qədər çox mane olacaq.
Özünüzü mükafatlandırın
Məqalənin bu hissəsi ən çox sevdiyiniz məqam olacaq. Gündəlik vərdişləri yerinə yetirdiyini zaman özünüzü mükafatlandırın. Məsələn, oxumağa başladığınız zaman özünüzə söz verin ki, bunu bitirəndə yarım saat oyun oynayacam. Daha böyük arzularınız varsa, həftəlik oxumaq vərdişi ilə əlaqələndirə bilərsiniz. Məsələn, həftə ərzində tamamlamalı olduğum materialları oxuyub bitirsəm gəzməyə gedəcəm.
Mükafatlar vərdişləri sizə sevdirəcək. Həmçinin böyük bir işin öhdəsindən gəlmiş kimi hiss edəcəksiniz. Etdiklərinizin həcminə uyğun mükafatlar təyin etməyi unutmayın.
Vərdişlərinizi izləyin
İnkişafı görə bilmək üçün oxumaq vərdişi yaratdığınız gündən izləmə aparmalısınız. 30 günün sonunda siz nə qədər inkişaf etdiyinizi görməlisiniz. Özünüzə bir cədvəl hazırlayaraq bunu edə bilərsiniz. Günlərin və hər gün oxuduğunuz səhifələrin sayını qeyd edin. Hər ay əldə etdiyiniz nəticələr sizə daha çox motivasiya verəcək. Bu işdə nə qədəruğurlu olduğunuzu başlanğıc və son ədədlər arasındakı fərq göstərəcək.
Əgər cədvəl hazırlamaq sizə çətin gəlirsə, smartfonlar üçün hazırlanmış tətbiqlərdən istifadə edə bilərsiniz. Bir neçəsini qeyd sizin üçün qeyd edirik: Habitica, Habitify, Coach.me, HabitHub, Beeminder, TickTick
Qeyd olunan üsullar oxumaq vərdişi ilə yanaşı digər fəaliyyət növlərinə də aid edilə bilər. Əlavə hər hansı vərdiş yaratmaq istəyiniz varsa, bu üsullardan istifadə edə bilərsiniz. Əmin olun, effektini görəcəksiniz.
Bütün bu qeyd olunanları yerinə yetirməzdən əvvvəl aşağıda qeyd olunan 3 şərti mütləq tətbiq edin:
Effektiv oxuma saatlarınızı müəyyən edin.
Günün fərqli saatlarında oxuyun və hansı saatlarda beyninizin daha aktiv olduğunu dəqiqləşdirin. Bəzi tələbələr gec saatlarda effektiv oxuyarkən digərləri sübh çağında oxumağı üstün tutur. Bu individual olaraq dəyişir. Öz saatlarınızı müəyyənləşdirin və həmin zaman aralığında oxumağa çalışın.
Oxumaq üçün guşənizi təyin edin.
Yemək masasında oxumaq düşündüyünüz qədər effektiv deyil. Beyin vərdişləri məkanlara uyğun qruplara bölür. Yataq otağında oxumağa çalışsanız, yuxunuz gələcək. Əgər yataq otağında iş guşəsi yaradıb, oxumaq üçün motivasiyaedici ab-hava yaratsanız, bu işə yarayacaq.
Oxuma guşənizi səssiz məkanda seçməyi unutmayın. Əks halda diqqətiniz yayına bilər. Həmçinin masanın üzərində yalnız oxuyacağınız materialların olmasına diqqət edin. Bir kitabı oxumalı olduğunuz halda bütün materialları masada saxlasanız, tez-tez fikriniz yayınacaq.
Oxumaq üçün ayırdığınız zamanda fikrinizi yayındıracaq fəaliyyətləri uzaq tutun.
Əgər kompüterlə işiniz varsa, sadəcə ehtiyacınız olacaq platformaları açıq saxlayın. Kompeterinizdə oyunlar varsa, onları əlçatmaz edin. Məsələn, xüsusi şifrəli qovluqlarda gizlədin. İnternetə ehtiyacınız yoxdursa, kompüterin bağlantısını kəsin.
Telefonunuza ehtiyacınız yoxdursa, söndürün və ya pilot rejimində saxlayın. İnternet bağlantısına və telefona ehtiyacınız varsa, sosial medianı, oyunları, eləcə də fikrinizi yayındıran digər proqramları gizli saxlayın və bildirişləri bağlayın. Əks halda telefondan gələn bir səsə saatarınızı sərf edə bilərsiniz.
Gördüyünüz kimi yeni vərdiş yaratmaq düşünülən qədər çətin deyil. Kiçik hədəflə başlayın, davamlılığı qoruyun və inkişafı daim izləyin.
İndi sıra söz sizdədir. Sınadığınız yeni vərdiş əldə etmə yollarını bizimlə paylaşın. Yaxud qeyd olunanları sınadıqdan sonra fikirlərinizi bizimlə bölüşün. Hər zaman sizi dinləməyə hazırıq!
1,418 total views
